【曼聯勢放棄】伊巴慘斷兩韌帶 要抖9個月-Firstr 資料站

【曼聯勢放棄】伊巴慘斷兩韌帶 要抖9個月

作者:Caroline    發表日期:2017-06-03 04:46:01

即上英超刨績王:http://win.on.cc/epl 

諗都諗唔到,於歐霸主場對安德列治,或者係伊巴謙莫域最後一次為曼聯上陣!周四深夜紅魔鬼力爭入歐霸4強,去到完場前伊巴落地落得唔好,拗到膝頭右腳重創。意大利知名記者Di Marzio爆料,伊巴膝頭前、後兩條韌帶均有撕裂現象,做完手術後要抖9個月,最快都要到出年1月先可以復出。到時伊巴已經36歲,曼聯或者會逼不得已放棄呢位老將。

伊巴受傷之後顯得非常痛楚,需要即時調離火線,雖然勞基梳爾於賽後表示,伊巴受傷後於更衣室行得走得,不過Di Marzio表示伊巴傷勢極重,慘到兩條韌帶都有斷裂現象,需要盡快進行手術。韌帶康復需時,加上伊巴年齡唔細,所以保守估計要出年先可以康復,對呢位瑞典戰神嚟講肯定係噩耗。

伊巴一向以硬淨見稱,於職業生涯絕少出現大傷,估唔到去到尾段先遇到重大挫折。本季伊巴表現一流,已經射入28球,領隊莫連奴極希望同佢簽多一年約,但依家伊巴2017年拜拜,據稱紅魔方面已對續約事宜暫時擱置。此外,本身中超及美職球會均對伊巴虎視眈眈,現時亦轉向抱觀望態度。

伊巴1999年於馬模開始職業生涯,之後曾效力阿積士、祖雲達斯、國際米蘭、AC米蘭、巴黎聖日耳門及曼聯,除馬模外,於每間球會佢都攞過頂級聯賽冠軍,今次重傷可謂人算不如天算,其驕人聯賽冠軍成績,或會喺紅魔鬼生涯中斷纜。

東網體育同你追實體壇每個精彩時刻! 
http://bit.ly/2ecTF2A 


本文來源:http://hk.on.cc/hk/bkn/cnt/sport/20170422/bkn-20170422043428288-0422_00882_001.html




Tag:
本文鏈接:http://www.firstratelogistic.com/11638.html