政Whats噏:改議事規則現暗湧 建制施快刀-Firstr 資料站

政Whats噏:改議事規則現暗湧 建制施快刀

作者:Linda    發表日期:2017-10-27 19:32:01

立法會隨着去年青年新政梁頌恆、游蕙禎所觸發宣誓風波,2人連同社民連梁國雄、香港眾志羅冠聰、劉小麗、姚松炎一同被褫奪立法會議員資格(DQ),現時立法會共有6個議席空缺,民主派剩返嘅大部分屬於傳統溫和泛民。建制派為杜絕民主派拉布,就想把握機會修改《議事規則》,更由建制派議員陳克勤同張宇人代表出擊,去信立法會議事規則委員會要求修改。不過,坊間一直以為修改《議事規則》嘅死線係明年3月,但時間其實緊迫得多,建制派呢個大計可謂充滿暗湧!

根據《基本法》,任何由議員提出嘅法案、議案同修正案都需要經分組點票,即在席功能界別同地區直選議員各半贊成先可以通過。惟隨住6人被DQ,建制派同民主派勢力分布有所改變,建制派首次喺地區直選嘅議席較泛民多,加上本身喺功能界別有壓倒性優勢,所以理論上夠票修改《議事規則》。

然而,建制派要採取行動就要夠快,要趕喺明年3月11日立法會新界東、九龍西、港島區,以及建築、測量、都市規劃及園境界4個議席補選前進行,事關3場地區直選嘅補選各填補一個議席,喺單議席單票制下,好大機會由民主派奪得,屆時建制派同民主派喺地區直選議席將為16對17,建制派就難以再改《議事規則》喇。

不過,3月補選前完成相關工作只係名義上嘅死線,有建制派議員就坦言時間其實非常緊迫,預計真正打仗會喺明年1月。因為立法會喺12月尾至明年1月初將放3個星期聖誕及新年假,2月又遇上農曆新年及政府發表財政預算案,3月首兩星期就正值內地兩會召開,立法會慣常都唔開會。

計計埋埋,補選前最後一次會議就係明年2月7日舉行,所以如果嗰陣都未通過修改《議事規則》,建制派嘅大計就可以宣告自然死亡,難怪有建制派大呻時間極之緊迫。加上泛民已明言會拉布拉到補選,早前仲打尖提出有關《議事規則》嘅修訂,企圖截建制派糊,所以建制派要趕及修改《議事規則》真係危危乎!

由建制派人數佔多嘅議規會亦已開快車加緊處理,初步訂咗下月初召開2日共8個小時會議,足證建制派都想快刀斬亂麻,盡快將建議提交大會審議。議規會主席謝偉俊亦承認處理修改《議事規則》嘅時間緊迫,但強調會盡做,睇嚟建制派都知時日無多喇。


本文來源:http://hk.on.cc/hk/bkn/cnt/news/20171027/bkn-20171027225215731-1027_00822_001.html




Tag:
本文鏈接:http://www.firstratelogistic.com/31330.html